Ana Ortiz amosa o compromiso da Xunta coa comunidade peruana en Vigo

A delegada territorial da Xunta de Galicia en Vigo, Ana Ortiz, recibiu este venres na súa sede á xunta directiva da Comunidade Peruana en Galicia para coñecer de primeira man a situación deste colectivo na área de Vigo.

Durante o encontro, os representantes da asociación explicaron as diversas actividades que están a levar a cabo para dinamizar a comunidade e manter vivas as súas tradicións.

Ortiz, pola súa banda, amosou o compromiso da Xunta con este colectivo e aproveitou a xuntanza para ofrecerlles a súa colaboración.

Incorporación ao mercado laboral

Así mesmo, a delegada informou aos asistentes sobre as distintas opcións formativas que a Xunta pon á disposición de toda a cidadanía co obxectivo de facilitar a súa incorporación ao mercado laboral de maneira regular e estable.

A reunión rematou cunha valoración moi positiva por parte de ambas as dúas partes, que acordaron seguir mantendo un diálogo fluído. A Comunidade Peruana en Galicia busca, desta maneira, fortalecer lazos coas institucións galegas para poder atender mellor as necesidades dos seus membros e promover a súa integración plena na sociedade.