Máis cantidade e variedade para os menús de Xantar no Fogar

Lugo

O Concello de Lugo, a través da área de Benestar Social que dirixe Olga López Racamonde, ofrecerá un total de 41.691 menús dentro do servizo de Xantar no Fogar durante o 2022. O executivo de Lara Méndez destina un total de 210.423 euros a este proxecto, un 144% máis que o ano pasado : 86.000.

Olga López conta que con esta axuda se están a beneficiar preto dun centear de persoas e contan poder axudar todavía a máis "obxectivo de atender os novos tipos de dependencia que ocasionou a pandemia, que fixo agromar carencias non só económicas senón tamén de coidados e alimentación”.

Deste xeito, o próximo mércores, a Xunta de Goberno adxudicará o contrato á empresa Alimentación Saludable Gallega S.L que presentou "a oferta máis vantaxosa dentro da que se inclúen, todas as melloras recollidas nos pregos e coas que pretendemos acrecentar a nosa capacidade e que esta se traduza, tamén, nunha maior calidade de vida para todas e todos os usuarios do programa”, indicou López Racamonde.

Maior variedade de dietas con catro novas opcións: vexeteriana, vegana, sen carne de porco e sen carne de vaca ou a rotación dos menús cada 6 semanas, estas son algunhas das melloras que se achegarán a nova edición do proxecto local.

Cada beneficiario/a recibirá ademais un litro de leite e outro de zumo de frutas á semana e se disporá de "catro novas neveiras para poder cederlles a aquelas familias que non teñan outra maneira de garantir a conservación dos alimentos que se lles entregan”.

Fixo a concelleira especial fincapé no control sanitario que se fará sobre os alimentos así coma a súa mestura: "Deben combinarse dun xeito saudable respectando as pautas médicas que figuran no expediente de cada beneficiario”.

Segundo o Concello, en torno ao 60% dos beneficiarios destas axudas, son mulleres, maiores de 65 anos, que viven soas e ás que, "logo do confinamento obrigado que impuxo o Estado de Alarma, a permanencia do COVID as mantén nun illamento aconsellable ante o risco de contaxio”.

No Concello de Lugo hai 5.000 persoas maiores de 65 anos que residen soas nas súas vivendas e sobre as que, dende a área de Benestar, "se realiza un seguimento continuado co fin de informalos dos recursos que teñen á súa disposición en función das necesidades que presenten e que inclúe tanto a súa manutención".