Pablo López: “A medicina gráfica pode axudar na comunicación cos doentes”

Ourense

O debuxante Simón Blanco elaborou unha infografía no marco do traballo que está a desenvolver o equipo multidisciplinar. Trátase dun conxunto de profesionais sanitarios do Complexo Hospitalario Universitario de Ourense, que se encarga de mellorar a atención aos doentes coa síndrome confusional.

A síndrome confusional ou delirum é un trastorno, que aparece nas persoas maiores hospitalizadas ,ou persoas ingresadas na Unidade de Cuidados Intensivos, e que pode ter graves repercusións na saúde. Normalmente aparece nos tres primeiros días de ingreso ou cando hai cambios de ubicación. A axitación, inquedanza, postración, ver cousas que non están, non durmir pola noite ou un estado de agresividade son algunhas das súas manifestacións.

Falar da medicina gráfica é falar do papel que poden ter os cómics e as ilustracións no eido sanitario. O internista Pablo López está a facer un mestrado nesta especialidade e considera que pode ser unha importante ferramenta para “comunicarnos cos doentes”. Entre esa comunicación están os consellos que se poden seguir para minimizar as posibilidades de padecer a síndrome confusional. Entre os máis importantes está ter o reloxo, non durmir en oscuridade total ou evitar ruídos. De igual forma, o persoal sanitario pode entender a través dos cómics a visión dos doentes sobre eles.