Xinzo convoca o concurso de narración curta Carlos Casares

Xinzo de Limia

Unha primavera máis, e xa van seis, o Concello de Xinzo de Limia convoca o Concurso infantil e xuvenil de narración curta Carlos Casares. O autor, que para o público máis novo escribiu obras como “O galo de Antioquía”, volverá a inspirar a todo o alumnado participante. Con motivo da próxima celebración das Letras Galegas, a Concellería de Cultura vén de facer públicas as bases polas que se rexerá o certame. Outorgaranse dous galardóns en cada unhas das categorías, case 2.000 euros en premios, consistentes en vales para mercar libros nas librarías da vila.

Aquelas persoas que desexen compartir o seu talento literario poderán concorrer ao premio cun relato escrito inédito en lingua galega. A temática será libre e establécense sete categorías: unha para os cursos de infantil; tres para os diferentes ciclos de primaria; dúas para os de secundaria e unha para os alumnos de bacharelato en adiante.

Está previsto que o fallo do xurado, composto por membros da Fundación Carlos Casares, escritores limiaos, profesores de Lingua e Literatura e técnicos de Cultura e Educación do Concello, se faga público o 17 de maio.