Hoy por Hoy Lugo Informativo Matinal 8:20h (21/07/2020)

O Clube Deportivo Lugo conseguiu na xornada de onte a permanencia na Segunda División tras vencer ao Mirandés por dous goles a un, nunha xornada marcada polo aprazamento do Deportivo Fuenlabrada, tras detectarse 7 positivos por coronavirus no equipo madrileño. Os de Juanfran García dominaron un partido, ao que os albivermellos tiveron que darlle a volta, tras empezar perdendo e grazas aos goles de Cristian Herrera o Lugo estará por novena tempada consecutiva na Segunda División. Os casos activos do brote de coronavirus da mariña lucense continúan descendendo ao rexistrarse 26 casos menos que na pasada xornada, onde hai un total de 86. Mentres, o foco de Vilalaba e Xermade estabilízase con seis infectados, do mesmo núcleo familiar. En canto aos datos da provincia, Lugo ten a día de hoxe 136 casos activos, tres menos que na xornada de onte, con catro persoas ingresadas no Hospital de Burela. Ata a data rexistramos 1.233 positivos por Covid-19 con 1.069 persoas recuperadas e 28 falecidas. A reunión do Ere de Alcoa conclúe sen avances nin acordo para ampliar a negociación, mentres desde o goberno central eluden a intervención da fábrica e insisten no plan industrial para a multinacional. O concello de Lugo publica as listas provisionais de admisión nas escolas infantís municipais. A área de Cultura do consistorio lucense conmemora o vindeiro xoves a apertura do Vello Cárcere hai 133 anos cunha exposición virtual. A Deputación de Lugo impulsa unha nova edición do Festival Bal y Gay como reclamo turístico e cultural na mariña lucense. Mentres Viveiro acollerá este ano dous concertos dese sétimo festival, os días 16 e 18 de agosto. Os agricultores e gandeiros galegos poden solicitar ata o próximo 30 de xullo os préstamos a interese cero que habilitou a Xunta de Galicia para adiantar os pagos da PAC.