Arabako toponimia nagusia aztertzen duen liburu bat aurkeztuko dute ostegunean

Vitoria

Patxi Salaberri Zaratiegi euskaltzain eta Euskaltzaindiko Onomastika batzordeko buruak egindako "Araba / Álava. Los nombres de nuestros pueblos" liburua aurkeztuko da Gasteizen, Arabako Foru Aldundian, datorren ostegunean, urtarrilaren 21ean. Liburuak Arabako toponimia nagusia aztertzen du eta Euskaltzaindiaren Izenak bildumaren barruan argitaratu da, Arabako Aldundiaren babesarekin.

Euskaltzaindiak jakinarazi duenez, Arabako toponimia nagusia da liburuaren xedea. Hala, Arabako herrien izenak emateaz gain, izen horien inguruko azalpen guztiak eskaintzen ditu: herriaren izen arautua, dokumentazio aldaerak, euskal mikrotoponimiako lekukotasunak, ebakera eta etimologia biltzen dira gehienetan.

Zenbait aldiz, gainera, herritarren izena, euskal testuetan agertzen diren toponimoen aldaerak, alonimoa (herriaren beste izena) eta oharren bat azaltzen dira. Lanaren bukaeran, Salaberrik ondorio linguistikoak atera ditu, hots, euskararen eta gaztelaniaren historiari doazkion kontuak aipatzen ditu.

Igone Martinez de Luna Arabako Aldundiko Euskara, Kultura eta Kirol Saileko foru diputatuak, Andres Urrutia euskaltzainburuak eta Patxi Salaberri Zaratiegi egileak egingo dute aurkezpena.