Falece Nonito Pereira, historia da música na Coruña

A Coruña

Faleceu Nonito Pereira, mítico xornalista musical da Coruña. Destacado promotor e comentarista musical morreu aos 76 anos e os seus familiares vélanlle nestes momentos en Servisa. Ademais da súa actividade xornalística e difusora do feito musical acuñou o termo "Música Celta" e creou o selo discográfico "Abrente" co disco "Fonte do Araño" de Emilio Cao.

Produciu tamén "Milladoiro" de Antón Seoane e Rodrigo Romaní e recibiu o Premio "Record World", un dos máis importantes do mundo de fala hispana, como mellor produtor no ano 1978.

Ademais achegou á cidade a música inglesa e americana e converteu o Praia Club nunha sala referente musical nacional. Foi un dos artífices do Noroeste Pop Rock como asesor do Concello da Coruña. Di a web de historia de Radio Juventud, onde comezou, que é o único comentarista musical que figura na Enciclopedia Galega.

As súas orixes

Nonito Pereira iniciou o seu labor profesional cara a 1964 como picadiscos no Praia Club da Coruña e preparando audicións musicais en torno ao Jazz. Traballou en practicamente todas as emisoras de radio da cidade desde Radio Coruña Cadena SER a Radio Juventud, onde debutou, Radio Nacional, Cadena Cope ou Antena 3 onde foi xefe de programas. Foi tamén director de Radio Minuto Coruña. Foi delegado en Galicia da Cadena Española de Comentaristas Musicais e representante da Cadena Latinoamericana de Comentaristas Musicais. Tamén colaborou con La Voz de Galicia e o Ideal Gallego e presentou o exitoso programa "Radio Onte" na TVG.

Recentemente os seus fillos crearon unha asociación que leva o seu nome e que busca manter viva a súa produción xornalística en materia musical. Son membros fundadores da asociación Bieito Romero, membro do grupo Luar na Lubre, o xornalista Rubén Ventureira, o ex director da Escola Municipal de Música José Acuña, e o músico galego Xosé Veloso Quintas.