José Marcote: "Toca apoiar dunha vez por todas, todos a unha"

"Ou todos a unha ou non facemos nada". O alcalde de Fisterra ten claro que o proceso de reconstrución da bisbarra pasa por establecer unha fronte común entre os diversos concellos da bisbarra. "Se queremos que as reclamacións teñan impacto debemos ir todos unidos, senon é mellor non pedir nada" aseguro José Marcote nos micrófonos de Radio Nordés. O rexedor fisterrán considera que toca ir pensando "cales poden ser as estratexias a seguir e en canto a situación o permita, ver que hai que poñer enriba da mesa".

Marcote desexa que a volta a normalidade se produza "o máis rápido posible pero con seguridade". Nunha vila onde o turismo e o Camiño de Santiago teñen un peso importante na súa economía, Marcote ten claro que dependen "moito desa xente que nos ven de fóra". Por iso cre que o proceso de desconfinamento debe ir "por territorios, que a xente se mova polo máis cercano e logo ir ampliando as distancias".

Co actual peche do sector hostaleiro e hoteleiro, é evidente que "o impacto sobre Fisterra está sendo bastante importante". De todos xeito non quere que o empresarios destes sectores caian presa do desánimo. "Non convén precipitarse porque cada semana cambia o escenario, é todo moi cambiante. Pode ser precipitado considerar que o ano está perdido".