O Festival Sinsal celebrarase do 23 ao 25 de xullo na Illa de San Simón
As entradas, que inclúen o transporte marítimo desde o litoral ata a illa, sairán á venda nos primeiros días do mes de xullo
Concierto de una edición pasada del festival / Cadena Ser
Vigo
A Illa de San Simón acollerá de novo a selección sonora máis coidada e exquisita do panorama musical galego. O Festival Sinsal SON Estrella Galicia regresa este verán á illa pontevedresa, do 23 ao 25 de xullo, para achegar ao público as creacións máis estimulantes e vangardistas do momento.
Logo dunha edición de resistencia, celebrada no litoral, neste 2021 o Festival Sinsal SON Estrella Galicia regresa á illa de San Simón e, con esta volta, regresa a súa propia esencia como evento: tres xornadas de música e contacto coa natureza, con propostas singulares e contemporáneas, directos suxestivos e a illa como cabeza de cartel dun line up que é secreto ata que o público desembarca en San Simón.
As músicas de vangarda e de raíz, manifestacións urbanas e sonoridades modernas ou con influencias electrónicas conforman a paisaxe sonora que propón este ano Sinsalaudio e que acompañará, ao longo de tres xornadas, ás asistentes desta edición, nomeada Sinsal Esencial. Unha atractiva escolma de artistas agóchase detrás do cartel dun festival que se desenvolverá os días 23, 24 e 25 de xullo en horario de tarde.
O cartel secreto do Sinsal Esencial non será a única sorpresa para o público que se achegue a este singular enclave das Rías Baixas. Este ano, cada banda e artista participante ofrecerá un único concerto nesta edición, polo que o programa de cada día será completamente diferente ao anterior. Nas vindeiras semanas, Sinsalaudio dará a coñecer outras novidades que permitirán poñer en valor tanto esta singular iniciativa musical coma o propio espazo natural no que se desenvolve.
As entradas de SinSal SON Estrella Galicia sairán á venda nos primeiros días do mes de xullo a través da plataforma Enterticket. O público poderá adquirir os seus billetes para cada xornada de concertos de xeito individual -sen posibilidade de adquirir abono- e estableceranse prezos diferenciados entre o público adulto e o menor de 16 anos -inclusive-. Como é habitual no festival, cada ticket incluirá, ademais do acceso aos concertos secretos na illa de San Simón, o transporte en barco até a mesma desde o continente.
