A CIG convoca unha manifestación para demandar un futuro industrial para o sector da automoción

Vigo

A federación de Industria da CIG continúa coa súa campaña en defensa do sector galego da automoción e convoca unha manifestación en Vigo para este martes día 6 de xullo.

A marcha, que se celebra baixo o lema 'Por un futuro industrial para a automoción', arrincará da porta principal do grupo Stellantis (antiga PSA Citroën) ás 10:00 horas e rematará diante da delegación da Xunta na cidade.

A central sindical leva dende o ano 2018 advertindo sobre o descenso da actividade no sector, que neste tempo provocou reducións dos cadros de persoal nas empresas principais e a non renovación de contratos ao persoal eventual, cunha afectación directa sobre o emprego e a actividade nas empresas subcontratadas.