A CIG denuncia a "situación extrema" na que se atopan os centros de saúde do Baixo Miño por falta de persoal
Dende a central sindical apostan por mellorar as condicións laborais e por estabilizar o emprego para atraer profesionais
Centro de Salud / Concello de A Guarda
Vigo
A CIG-Saúde de Vigo vén de denunciar publicamente a “situación extrema” na que se atopan os centros de saúde da comarca do Baixo Miño como consecuencia da falta de persoal. Dende a central sindical apostan por mellorar as condicións laborais e estabilizar o emprego para atraer profesionais, xa que dos 16 residentes que completaron a súa formación na zona este ano só tres continuaron o seu labor nela.
Como consecuencia desta situación, onte mesmo o centro de saúde do Rosal só contou cunha médica, situación que se vén repetindo no últimos mes en varias ocasións. “A situación é grave, xa que ten que asumir a asistencia dun concello de máis de 6000 persoas, que no verán ve aumentada a súa poboación”. Isto provoca que no caso de ter que asistir a algunha urxencia que requira ir acompañada ao hospital, a localidade quedaría sen persoal médico arredor de dúas horas debido á lonxanía do hospital.
Por iso na CIG consideran que a sobrecarga de traballo do persoal coloca o centro nunha situación insostíbel, “máis cando se sabe que non se trata dun problema puntual, senón que se vai repetir durante o verán”.
