Responde cun bate de béisbol ás ameazas dun "aparcacoches" no HULA

Lugo

Segundo informa a Policía Local de Lugo, na mañá do pasado martes día 3 de agosto, un veciño solicitou a intervención da patrulla da Unidade Territorial de Policía de Barrio ao verse " ameazado por un aparcacoches". Os xa coñecidos popularmente coma  gorrillas do HULA piden cartos a cambio de atopar un sitio de aparcamento para os usuarios que acuden ao complexo hospitalario Lucus Augusti.

Deste volta, o condutor "manifesta que, despois de estacionar e negarse a dar diñeiro, a persoa que llo pedía ameazouno con causarlle cuantiosos danos ao seu vehículo se non o facía".

O aparcacoches en cuestión, "que foi localizado nas proximidades polos axentes", declarou que o condutor "lle ameazou cun bate de béisbol". E malia o intercambio de despropósitos,  ningunha das partes quixeron presentar ningún tipo de denuncia polo sucedido.

Porén, "tanto ese aparcacoches como outro máis, que se atopaba nas inmediacións, foron denunciados por exercer a devandita actividade", asegura a Policía Local. Ambos foron denunciados por "infracción á Lei de Protección da Seguridade Cidadá, por desobediencia a axentes da autoridade, xa que, despois de ser advertidos, continuaban exercendo a mesma actividade", resolven.