Alertan do aumento no tempo de asistencia das emerxencias sanitarias no Morrazo por falta de ambulancias do 061
Lembran que a comarca conta tan só con tres unidades de Soporte Vital Básico con base en Cangas, Moaña e Bueu.
Imagen de archivo de una ambulancia del 061.
Vigo
A CIG alerta do aumento no tempo de asistencia das emerxencias sanitarias no Morrazo como consecuencia da falta de ambulancias do 061, unha problemática que se agrava durante o verán, tal e como denuncia o persoal sanitario, que incide na “grave situación” que se vive na comarca pola escaseza de vehículos de emerxencias. Diante disto, na central sindical consideran “imprescindíbel e urxente” o reforzo do servizo e acusan o Sergas de ocultar datos sobre a verdadeira realidade da asistencia extrahospitalaria na zona.
Lembran que a comarca conta tan só con tres unidades de Soporte Vital Básico con base en Cangas, Moaña e Bueu. Estas ambulancias poden, cando así o require a gravidade da situación, recoller persoal nos Puntos de Atención Continuada (PAC) ou nos centros de saúde. “A realidade habitual é que estes tres vehículos de emerxencia estean permanentemente ocupados ao longo do ano, sobre todo en horario diúrno, o que provoca a activación de ambulancias con base noutras vilas afastadas”.
