Alumnos emprendedores en primaria

Tomiño

Ao abeiro do programa ‘DepoEmprende na Escola’ da Deputación de Pontevedra, os 25 alumnos de 5º e 6º de primaria do CEIP Plurilingüe de Tebra en Tomiño crearon dende cero as cooperativas ‘Tebralidades’ e ‘Recuncho creativo’, que contan con consello reitor e división por departamentos.

A partir de xaneiro traballarán nas dúas propostas empresariais coas que buscan achegar o seu gran de area a coidar o medio ambiente mentres colaboran con causas solidarias. Os 12 socios integrantes de ‘Tebralidades’, mestura de Tebra e manualidades, teñen como obxectivo traballar día a día para facer un Tomiño máis verde, por iso elaborarán produtos útiles feitos con materiais de refugallo. Plásticos, cartón, tapón e cortiza convérteranse, baixo as súas mans, en posavasos e salvamanteis, portalapis ou macetas que logo venderán á veciñanza.

O 40% dos beneficios recadados irán destinados á asociación Vontade de Tomiño, que traballa con persoas con discapacidade. O 60% restante irá destinado a axudar a financiar unha excursión de fin de curso conxunta coa outra cooperativa do colexio, con destino Port Aventura. Pola súa banda, os 13 socios de ‘Recuncho creativo’ quixeron que o seu logo reflectira á perfección as súas intencións, por iso escolleron unhas tesoiras que representan “a igualdade do home e da muller no mundo da costura e un rotundo non á violencia de xénero marcado polos tons violetas dunha parte da imaxe”.

Esta cooperativa do alumnado do CEIP de Tebra deseñará e elaborará prendas de roupa feitas con materiais reciclados ou teas que xa non se usan para reducir o uso de plástico e papel de aluminio para envolver os bocadillos da merenda. Todos os seus produtos están elaborados de forma tradicional, cosidos a man ou coa máquina de coser da que dispoñen no centro. Neste caso o 40% dos beneficios irán destinados á asociación Bicos de papel, que ofrece axuda ás familias de nenos con cancro do Hospital Álvaro Cunqueiro.