O incendio de Lariño, en Carnota, calcina xa 100 hectáreas
O lume iniciouse ás 15.07 deste domingo en Lariño, coa súa orixe no incendio dun vehículo
Carnota
O incendio que se orixinou este domingo no municipio de Carnota continúa activo e xa calcinou 100 hectáreas, segundo o último balance da Consellería de Medio Rural. O lume iniciouse ás 15.07 deste domingo en Lariño, coa súa orixe no incendio dun vehículo.
Esta medianoite veciños de Lira deixaron voluntariamente os seus domicilios debido á cantidade de fume nas proximidades, aínda que non hai que lamentar danos persoais. O tráfico pola AC550 permanece aberto aínda que os profesionais piden evitar achegarse pola zona para manter as vías libres para o paso de vehículos de emerxencias.
Ata o momento mobilizáronse para o seu control 1 técnico, 11 axentes, 17 brigadas, 13 motobombas, 2 pas e 1 helicóptero.
A Consellería do Medio Rural lembra que está a disposición da cidadanía o número de teléfono gratuíto 085, ao que deben chamar en caso de detectar algún lume forestal. Ademais, existe un teléfono anónimo e gratuíto para denunciar calquera actividade delituosa incendiaria da que se teña sospeita ou coñecemento: 900 815 085.
Así mesmo, toda a información actualizada sobre incendios forestais poderá ser consultada na conta aberta de twitter: @incendios085.
