Arantza Portabales: "A novela fala da xente que non é capaz de pasar páxina na vida"

Santiago de Compostela

Santiago de Compostela, 24 de xullo de 2021, seis amigos, antigos compañeiros nun piso de menores tutelado pola Xunta, reencóntranse nunha cea. Durante o espectáculo pirotécnico dos fogos artificiais, un deles morre dun disparo.

Este é o arranque ó máis puro estilo Agatha Christie, dunha historia que vai e vén do presente ó pasado mentras o inspector Santiago Abad e a subinspectora Ana Barroso tratan de dar co asasino. A novela ten un ritmo trepidante e fala "da dor, do loito, de como superar a morte, de como hai xente que vive ancorada no pasado e non é quen de pasar páxina", conta a autora na entrevista no Hoy por Hoy Santiago. Portabales fuxe da corrección política unha vez máis con Santiago Abad que, nesta entrega, segue loitando contra o seu problema de falta de control da ira, agudizado pola tensa relación que mantén coa súa compañeira Barroso e a entrada en escea do comisario Veiga

Compostela, a cidade na que transcorre a acción da novela é tamén moi protagonista no relato. A autora ubica a acción por toda ela, dende a comisaría de Rodrigo de Padrón, ata a Algalia, a rúa na que vivía o grupo protagonista, pasando polos barrios de vista Alegre, Galeras, San Lázaro ou mesmo, fóra da capital, Sigüeiro e Cacheiras. Algúns dos seus recunchos xa merecen a atención dos lectores. "A xente entra na Horta do Obradoiro e pregunta cal é a mesa na que morre a personaxe da miña novela", contaba Arantza en referencia a un comentario que lle fixo Kike, copropietario do restaurante.

"O home que matou a Antía Morgade", foi editada por Galaxia en galego e Lumen en castelán, saiu á venda o dezaseis de febreiro e xa vai pola segunda edición.