A reurbanización da rúa Estrela completará o proxecto de posta en valor da contorna do balneario de Carballo

A Costa da Morte

Comezaron as obras de reurbanización da rúa Estrela, que completará as actuacións previstas no plan director dos Baños Vellos e para a posta en valor da contorna do balneario, o único en funcionamento na provincia da Coruña. Nos últimos meses acometéronse obras de reurbanización das rúas Ourense, Baños Vellos, Pontevedra, Chile e Lugo, cun investimento total de máis de 700.000 euros.

Segundo indica o goberno local as obras da rúa Estrela demoráronse pola necesidade de contar coa autorización da Dirección Xeral de Minas da Xunta de Galicia, xa que se sitúan na zona de protección da autorización de aproveitamento de augas mineiro-medicinais e termais “Virxe da Estrela”. Neste sentido, na execución das obras deberán adoptarse unha serie de medidas que afectan á instalación da rede de saneamento.

A grandes trazos, o obxecto da intervención na rúa Estrela é a mellora da accesibilidade e da seguridade viaria tanto na propia vía coma nos seus entronques coas rúas Perú, Vázquez de Parga e Baños Vellos, dentro do marco de melloras de calidade urbana que se están levando a cabo nos últimos anos. Coa actuación en marcha estenderase á esta rúa a plataforma única, que xa existe en todo ese ámbito, e eliminarase unha das ringleiras de estacionamento para ampliar os percorridos peonís e incluír vexetación. O proxecto tamén inclúe a instalación de mobiliario urbano.

Ao mesmo tempo, as obras permitirán modernizar os servizos urbanísticos, mellorando os existentes e incluíndo outros novos.