Perfil de Jorge Suárez | O candidato que soña co ascenso do Racing

Ferrol

Nunha comida de domingo con Ana e os seus fillos atopa a felicidade Jorge Suárez, candidato de Ferrol en Común á Alcaldía de Ferrol. Defínese como tímido, familiar e vacilón, mentres a súa familia e as amizades consideran que é unha persoa tranquila e cun humor especial. Ou iso é o que din á cara, por detrás, di Suárez, non sabe que dirán del.

O que máis lle gusta de Ferrol é a mocidade ferrolá, a súa enerxía e empuxe, o seu amor pola cidade. E o que lle falta á cidade, segundo o candidato de Ferrol en Común, é un Racing de segunda. Algo que espera que se subsane este mesmo sábado.

No apartado cultural, se ten que elixir unha película escolle Pulp Fiction; como serie: Endeavour; un libro Catedral de Carver e unha canción Here comes your man do grupo The Pixies. Unha escolla que ben podería ser outra porque asegura que a selección depende do estado de ánimo.

Non sabemos se ten o visto bo de Suso Basterrechea, pero se Jorge Suárez tivera un orzamento ilimitado traería ás Festas de Verán de Ferrol a Red Hot Chili Peppers. De Penencia a Monteventoso, aí está o lugar preferido do candidato dentro de Ferrol. E fora da cidade, quédase con Vigo.

A paixón pola pertenza a unha clase que quere un mundo mellor e máis xusto é que move a Jorge Suárez. Pola contra, o que lle rouba a felicidade é a impotencia polo sufrimento humano evitable. Para recargar pilas e reconectar con ese momento reconfortante, sempre pode volver ás lembranzas dos veráns da infancia na Faísca, na casa dos seus avós, todo o día facendo o Mowgli.