Presenza da bisbarra nas listas do PSOE ao Congreso e ao Senado
Cinco nomes da comarca aparecerán nas papeletas socialistas
Congreso e Senado serán renovados o vindeiro 23 de xullo
Costa da Morte
A Executiva Provincial do PSOE acaba de confeccionar a proposta de lista para as eleccións xerais do próximo mes de xullo. De sair adiante (ten que recibir o aval do Comité Federal en Madrid este sábado) contará coa presenza de varias caras coñecidas do socialismo da Costa da Morte.
O número 1 da candidatura será o ministro de Sanidade e exdelegado do goberno José Miñones. Con Obdulia Taboadela e Montse García nos postos dous e tres respectivamente. No posto 5 proponse a Jorge Domínguez Castro, da agrupación socialista de Corcubión. Domínguez entrará na corporación municipal corcubionesa na vindeira lexislatura logo da renuncia de dous compañeiros. No posto 8 aparece Xosé Lois García Carballido, alcalde en funcións de Ponteceso e que tras perder case 1000 votos ten prácticamente imposible revalidar a alcaldía. Como suplentes proponse a José Manuel Pérez Abelenda, cabeza de lista o 28M en Coristanco e a José Marcote Suárez, alcalde en funcións de Fisterra e que tampouco repetirá mandato.
Para o Senado os candidatos propostos son José Antonio Sánchez Bugallo, alcalde en funcións de Santiago e que non repetirá na vindeira lexislatura logo da derrota do 28M, Natividad González Laso e o concelleiro camariñán Fabián Canosa Pasantes.
