O PSOE de Coristanco denuncia a subida de soldo do alcalde

Coristanco

José Manuel Abelenda, líder dos socialistas coristanqueses, afea ao goberno municipal a subida de soldo que pretenden levar a pleno o luns. Segundo o PSOE, o alcalde Juan Carlos García incrementará ás súas retribucións nun 67% e, en xeral, "aumentará o gasto en salarios un 90%" respecto á lexislatura anterior.

O PSOE cre que esa medida será sometida á aprobación do pleno este luns 26 e recibirá o visto e prace xa que o PP goberna con maioría absoluta. Para o voceiro socialista esta decisión vai supoñer "un gasto innecesario". Abelenda comparte a necesidade de que o goberno local reciba unha retribución pero considera excesiva a súa contía. "Non estamos dicindo que non cobren, porque todos os que traballan teñen que cobrar, pero isto é incrible". Dende a bancada socialista calculan nun 90% o incremento da partida destinada a adicacións exclusivas. Destacan tamén a partida destinada á contratación de persoal de confianza. "O alcalde nunca tivo asesor, pero agora vai a contratalo por aproximadamente 30.000 euros" manifestou o cabeza de lista do PSOE nas pasadas eleccións municipais.