Os mellores expedientes académicos de Tomiño teñen nome de muller

Vigo

As estudantes do IES Antón Alonso Ríos: María Fernández Iglesias, Virginia Beiro Bernárdez, Laura Baquero Pereira, Laura Calvo Calzao e Mae Taylor Heredero foron galardoadas co Premio Extraordinario de Bacharelato, pasando a formar parte do grupo de excelencia composto polo alumnado coas notas máis altas de Galicia nesta etapa educativa e nas probas de acceso á universidade.

Un logro académico para María, Virginia, Laura, Mae e Laura que sitúa ao instituto tomiñés no camiño da excelencia, cunha alta porcentaxe de éxito no centro, que este curso contaba con nove posibles candidatos e candidatas a acadar este premio. Agora todas elas, estudantes de ensinanza pública, comezan un novo camiño educativo que queren continuar en Galicia cursando os seus estudos superiores en universidades da comunidade.

A de María Fernández Iglesias é unha carreira de fondo: elixiu Humanidades e Ciencias Sociais para cursar Bacharelato e acaba de superar as probas de acceso ao Conservatorio Superior de Música, obtendo a primeira mellor nota de Vigo e a segunda de toda Galicia na especialidade de clarinete. Agora quere estudar xornalismo ou dereito a distancia para poder compaxinar estes estudos coa súa carreira musical.

Virginia Beiro Bernárdez ten o seu futuro claro: gustaríalle traballar nun laboratorio como investigadora. Para conseguilo vai estudar o Dobre Grao de Química e Bioloxía. A alumna de Ciencias Laura Baquero Pereira comezará agora a súa nova etapa educativa estudando Medicina. A súa meta, ser xinecóloga. Por Ciencias tamén foi Mae Taylor Heredero, futura médica.

Laura Calvo Calzado cursou os seus estudos no IES Antón Alonso Ríos pola rama de Humanidades e Ciencias Sociais. Agora quere estudar psicoloxía,; aínda que o futuro pode levala por derroteiros máis artísticos, xa que tamén destaca en debuxo e pintura, disciplina na que tamén ten gañado varios premios.

Únete al canal de WhatsApp de la SER