“A Xunta tería que aportar máis cartos aos concellos para o SAF ante o incremento do custe”

Cee

O concello de Cee está no proceso de licitación do Servizo de Axuda no Fogar que se incrementouse nun ano en 126.000€, acadando a cifra de 636.000. Margot Lamela pide á Xunta que incremente a súa aportación a un servizo que supón un gasto excesivo para as administracións locais. A alcaldesa ceense participou no espazo Pleno Aberto no programa Vivindo a Costa da Morte e falou de diversos asuntos da actualidade municipal. Outro servizo que incrementou considerablemente o custe e a Escola Infantil, “A Xunta vende a gratuidade das Escolas Infantís pero quen asume o custe somos os concellos” di a alcaldesa que entende as demandas das traballadoras uqe levan semanas en folga en toda Galicia, pero pídelle a elas que entendan tamén a situación dos concellos. Neste momento están en contacto coa Deputación para lograr unha residencia centro de día, pero logo será necesaria tamén a colaboración da Xunta.

Lamela contestou preguntas feitas dende os grupos da oposición. Dende o PP interesáronse polo avance do proxecto do PXOM, a alcaldesa asegurou que continúan traballando para rematalo o antes posible pero hai varios problemas que arranxar, un deles ten que ver cos lindes do municipio, como exemplo puxo o do cemiterio do Ézaro que está en terreo ceense.

Dende o PP tamén se interesaron pola situación do Centro Comercial. Segundo confirmou hoxe saen a licitación un par de locais dos sete que son propiedade do concello na planta alta e polos que varias empresas amosaron interese. A alcaldesa recorda que o Centro Comercial ten unha xerencia e debe ser esa xerencia a que traballe para lograr atraer negocios que se instalen nos locais baleiros. Con respecto ao resto de iniciativas para fomentar o comercio local, a alcaldesa confirmou que o proxecto de reforma do Mercado municipal leva aparelladas outras iniciativas para dinamizar o sector, tamén recordou que está lista a campaña de Nadal para incentivar as compras coa instalación dunha pista de xeo entre outras iniciativas.

En referencia a situación do Centro de Saúde, recordou que dende o traslado do PAC dende o hospital ao centro médico o custe do mantemento incrementouse considerablemente, un deles o subministro de gasóleo para a calefacción. Están en contacto coa Xunta para mellorar a eficiencia enerxética, por unha banda hai un convenio polo que a administración autonómica asumirá un 90% do custe, e traballan para cambiar portas e ventás.

Dende o BNG e IxCee criticaron a subida de taxas aprobada no último pleno, Lamela defendeu que son necesarias debido ao incremento do custe de servizos como a recollida do lixo e asegurou que en Cee estas taxas son inferiores á maioría de concellos da contorna.

A rexedora confía en que a unión dos paseos marítimos de Cee e Corcubión sexa unha realidade antes do remate deste mandato. Non quixo poñer data para o remate das obras de saneamento, dixo que neste momento van con certo retraso debido a varios contratempos polo que non confía que rematen no vindeiro verán como estaba previsto.

Con respecto aá situación de XEAL, Margot pídelle o comité que dea un paso adiante e obrigar á Xunta a sentarse e aclarar a situación, considera imprescindible actualizar os termos da concesión, e pon en dúbida de que na situación actual, cun único forno en funcionamento, se estean cumprindo as cláusulas concesionais por parte da empresa.

O concello de Cee preside este ano a mancomunidade de Fisterra, con respecto á proposta do BNG comarcal de ampliar os servizos da mesma, Lamela considera que debe facerse unha proposta máis concreta para plantexarlle á Deputación, aínda que inicialmente considera que é necesario mellorar os servizo que xa dependen da entidade, como o abastecemento de auga. Algunhas das propostas, como a de mancomunar as policías locais, a alcaldesa considera que poderían prexudicar aos veciños de Cee.