Volve a Residencia Literaria da Cidade da Cultura na procura de novos talentos

Santiago de Compostela

Ata o 19 de marzo está aberto o prazo de inscrición da nova convocatoria da Residencia Literaria da Cidade da Cultura. O seu director, o escritor Javi Peña, pasou este mércores polo Hoy por Hoy Santiago para animar os novos autores a participar.

Unha das grandes dúbidas de quen se interesa pola Residencia é se cómpre ter algunha obra xa escrita. "O único requisito é ser galego ou vivir en Galicia", aclara Peña. As e os solicitantes deben facer chegar unha proposta de cadanseu proxecto á organización. Unha vez recibidas, o equipo valora cada unha delas e escolle quen se fai coa residencia.

Logo de seren admitidos, as dez persoas beneficiarias compartirán textos e críticas nun espazo aberto, de respecto e de confianza mutua. "Facemos trinta sesións, tres con cada proxecto", describe Peña. O traballo da residencia, que vai dende o 1 ao 13 de xullo, comeza mesmo antes, con reunións telemáticas previas, para aproveitar ao máximo a experiencia presencial.

Peña tamén aproveitou para falar da escrita polo xeral. Asegura que a partir do que levamos dentro podemos aprender a escribir se incorporamos as mesteres ferramentas técnicas. "Todos temos esa capacidade de contar historias", sinala o autor.