ADEGAL solicita usar drons para tratar os cultivos nas parcelas asolagadas da Limia

Xinzo de Limia

O tempo solleiro chegou á comarca da Limia, porén as chuvias das últimas semanas deixaron os campos anegados. Dende a Asociación de Empresarios, Gandeiros e Agricultores da Limia calculan que "do cereal de inverno, na mellor das circunstancias, ao mello pode salvarse un 5%".

A presidenta da asociación, María Teresa Joga, explica que aínda que o tempo sexa establ, e nas vindeiras semanas "precisaríamos un periodo de quince, vinte días para poder proceder á sementeira do cereal de primavera". Un cereal de ciclo moito máis curto, de produción inferior ao cereal de inverno e que, en circunstancias normais, se recollería en xullo. Non obstante, este ano, retrasaríase até o mes de agosto. Entenden que os agricultores "que decidan sementar este tipo de cereal, tamén teñen a colleita perdida".

Para ADEGAL o dilema pasa por non sementar as parcelas declaradas na Política Agraria Común para sementar o cereal, arriscando ás consecuencias de incumprir, ou entón proceder a sementar sabendo que "vamos ter uns custos, que non vamos ter un beneficio". A semente do cereal e a suba dos hidrocarburos supoñen un condicionante neste proceso.

Alén do impacto das chuvias no cereal e na pataca, os gandeiros tamén se poden ver afectados no ensilado da herba, como aconteceu o ano pasado. Desta volta esa ensilaxe vai con retraso "isto vai provocar que cando se leve adiante o labor, irá fóra de prazo e implicará perdas económicas de cara ao próximo ano, que será cando consuman a herba que teoricamente xa debería estar en almacenado", afirma Joga que advirte que se están a dar perdas millonarias no tecido agrícola e gandeiro da Limia.

Ademais, dende ADEGAL reiteran unha demanda xa formulada o pasado ano: a implementación de drons para acceder ás parcelas asolagadas para aplicar os produtos fitosanitarios. Neste sentido, a asociación está traballando nun informe coas perdas estimadas do cereal e tamén nun listado de produtos fitosanitarios que se poderían aplicar mediante drons. Para este fin consultaron a distintas empresas. Informes que serán entregados á consellería de Medio Rural.