Atopan sen vida o corpo do navegante desaparecido ao suroeste de Fisterra

Fisterra

Salvamento Marítimo rescatou o corpo sen vida dun navegante ao que buscaba dende primeira hora da mañá. Eran as oito da mañá cando Salvamento Marítimo de Fisterra recibía un aviso dende a organización da regata Sailing Race Cap Martinique’ que partira dende La Trinité-sur-Mer (Francia) con destino Fort-de-France (Martinica). O coordinador da proba indicou que non tiñan noticias dun veleiro participante e non conseguían contactar con el.

A partir dese momento púxose en marcha un operativo de busca, informando de inmediato aos barcos da zona e mobilizando ao remolcador Don Inda, o helicóptero Helimer 401, o avión Sasemar 102 ademais do helicóptero Pesca 1 de Gardacostas de Galicia.

Ás 9.19 horas o axuiliar do Don Inda localizou o veleiro comprobando que non se atopaba o tripulante a bordo. A embarcación estaba co motor en marcha e a cana do timón rota. O Don Inda procedeu a remolcalo ata o porto de Brens. Pasado o mediodía foi atopado o corpo sen vida do desaparecido a cinco millas ao suroeste do Cabo Fisterra. O Pesca I trasladouno ata o porto de Vigo onde esperaba a Policía Nacional. As condicións meteorolóxicas foron adversas en todo momento con vento forza 7 do nordés. Salvamento Marítimo estivo en contacto constante coa organización da regata.