María Xosé Fernández, alcaldesa de O Valadouro: "Da traxedia hai que sacar forzas para pedir máis medios"

Lugo

Ferreira do Valadouro volve pouco a pouco á rutina tras o tráxico incendio que causaba o falecemento de dúas veciñas, nai e filla de 50 e 77 anos, nunha vivenda da localidade. O único supervivinte foi o pai dunha das vítimas, de 79 anos. A alcaldesa do Valadouro, María Xosé Fernández, traslada o seu fondo pesar pola situación do home: "É moi difícil pensar o que está pasando, non me imaxino ter que vivilo, o sentimento de pena que ten é moi fondo e pouco podemos facer para palialo".

A rexedora amosa o seu respeto pola intimidade do supervivinte e "dunha familia moi querida que queda totalmente rota" tras un suceso que ten a todo o municipio, tamén a ela mesma, segundo recoñece, "moi conmocionado.

Unha das primeiras decisións que tomou a corporación municipal, ademais de decretar tres días de loito oficial, foi a de impulsar un escrito, que redactará a propia alcaldesa, esixindo que se dote a comarca de máis medios de emerxencias. "É algo que moitas veces non pensamos ata que sucede", apunta, "pero xa cando tivemos o incendio en Santa Cecilia, que afectou sobre todo a Trabada e Ribadeo, vímonos impotentes".

Impotencia ante os lumes

Fernández pon de manifesto que moitos dos concellos da Mariña non teñen motobombas das que poidan facer uso en caso de emerxencia, e considera que todos os deberan estar dotados cun dispositivo deste tipo para dar unha resposta rápida e áxil ante un posible lume. "Xa foi algo que denunciei en máis ocasións, porque aquí estamos rodeados de madeira por todos os lados, e a posibilidade de que un incendio afecte á Mariña non se pode negar", destaca María Xosé Fernández.

Recorda ademais que "xa se ten falado da posibilidade de fusionar o servizo con Vilalba, pero non podemos estar a expensas de ter que chamar e esperar a que se desplacen". Opina pola contra que "debemos contar con medios suficientes, tanto materiais como persoais". Destaca, en todo caso, a labor que fixo o corpo de bombeiros: "Non se lles pode botar a culpa de nada, porque se portaron marabillosamente, isto está por encima das súas posiblidades".

Únete al canal de WhatsApp de la SER

Por estas razóns remitirá ese escrito ao resto de alcaldes e alcaldesas mariñanos, para que "poidamos facer forza común e pedir que se reforce o parque de bombeiros e o resto de servizos de emerxencias, como o GES ou o 061, para que poidamos telos cando as persoas os necesiten". Resalta o imprescidible que é que os profesionais conten con recursos, porque "son claves e poden chegar a salvarnos a vida, pero sen medios non poden facer miragres". É prioritario e imprescindible dotalos de recursos, apunta, e tamén cubrir as prazas cando está de vacacións, "pero moitas veces non nos damos conta ata que estamos no momento".

Fernández expresa a súa preocupación polo que puido ter pasado se o lume se comportase de maneira diferente e se estendese a outras partes do edificio: "Se tivera subido polas escaleiras poderíamos ter moitas máis desgracias". Por sorte, di, "a xente tivo a hablidade de saír ao balcón", nunha imaxe que lle recordaba a ela e máis ao resto de veciños ao incendio de Valencia: "Todo o mundo era consciente, polo menos era algo que a min me pasaba por dentro, a ansiedade daquelas persoas atrapadas naquel edificio".

Espera ter o documento listo ao longo desta semana, porque ata a o de agora, di, psicoloxicamente resultoulle imposible centrarse. Pide aos seus homólogos no resto de municipios da comarca que "sexan conscientes de que isto foi unha desgracia, pero temos que aprender dela e sacar forzas para pedir o que necesitamos, e impedir que volva suceder".