“Non é normal que aos turistas lle siga saíndo todo gratis”

As cifras de crecemento do turismo na Cota da Morte son realmente significativas na última década. O número de viaxeiros pasou de case 95.000 no 2010 a preto dos 170.000 no 2022.

Cada ano o incremento de pernoitas seguen superándose, en 2021 superaron por pouco as 211.000 e só un anos despois, non 2022, acadaron unha cifra superior aos 301.000.

Unha das fortalezas da oferta da zona é a variedade de oferta, con propostas para diferentes perfís de visitante xa sexa dende o punto de vista económico, de idade ou do tipo de actividade que busquen.

O reto está na necesidade de regular o actual crecemento para evitar problemas futuros. O maior número de visitantes provoca tamén un maior gasto en servizos públicos e non sempre é asumible para os concellos. A alcaldesa de Fisterra Áurea Domínguez considera que o resto de administracións deben axudar a concellos como o seu, incapaz de asumir o gasto que provocan os visitantes.

Unha das solucións sería cobrar unha Taxa Turística. Así o entenden tanto a alcaldesa fisterrá como o vicepresidente da Deputación Xosé Regueira, o vicepresidente do Clúster de Turismo Jesús Picallo ou o responsable da empresa Galitrips, dedicada ao aluguer de vivenda turística Dani Trillo. Aseguran que é o momento de valoralo e que podería ser beneficiosos tanto para as arcas municipais como para o propio sector. Regueira vai máis aló e volve poñer sobre a mesa a necesidade do cobro de entrada aos lugares máis visitados como o cabo Fisterra, precisamente o goberno local traballa nunha normativa neste sentido.

Outra das consecuencias do aumento de visitantes é a proliferación da vivenda turística, localidades como Fisterra ou Carnota están entre as que teñen un maior número destes negocios en toda Galicia, case á altura de Santiago ou A Coruña.

Dani Trillo, asegura que a demanda vai continuar aumentando e considera que para dar un servizo de calidade os concellos deben regular este sector, pide tamén unha maior eficacia na loita contra o aluguer ilegal.

Pola súa banda Jesús Picallo considera necesario aumentar as esixencias para vivenda turística, moi inferiores hoxe en día cos que ten o sector hoteleiro. Preocupa tamén o efecto negativo que está tendo o incremento oferta vivenda turística no prezo do aluguer de vivenda para os veciños da zona, nalgunhas poboacións estanse vendo desprazados das súas rúas ou vilas debido a un incremento do prezo inasumible para a maioría de salarios.

De cara ao futuro todos coinciden en que se debe seguir dando pasos cara a desestacionalización, traballando nunha oferta turística de calidade, sostible e que sexa beneficiosa para a poboación local.