Por que lle gusta aos pilotos a Subida a Vilar de Barrio?

Conta atrás para a Subida a Vilar de Barrio, que terá lugar o 25 e 26 de maio. Trátase dunha proba puntuable para o Campionato Xunta de Galicia. Non obstante, explica Celso Cerredelo dende o comité organizador, “hai outro nivel que sería o Campionato de España, pero o presupuesto é altísimo”.

Unha proba especial pola súa beleza e que “reflexa a tendencia actual do Campionato de Europa, máxima categoría que hai nas probas de montaña, porque é un trazado longo, ancho, bo asfalto, rápido e técnico, gústalle moito aos pilotos”, explica Cerredelo.

Este ano, como novidade, inaugurarase o Trofeo Memorial Alfonso Cid, finado hai uns meses, para o primeiro piloto ourensán clasificado. Outra homenaxe, figura no cartel “o coche do cartel é o do noso amigo Jorge Pérez, o que quixemos homenaxear en conxunto co seu irmán Gilillo, desgraciadamente falecido un día despois da nosa subida do ano pasado”.

O venres 24 haberá verificacións técnicas relativas á seguridade e para comprobar que se respecta a normativa, o resto de participantes chegará o sábado pola mañá. Ás dúas da tarde será a presentación dos pilotos na Estación de Borrán e haberá tres mangas o sábado e tres o domingo.