Rozouse a traxedia no Monte Pindo

Carnota

Os servizos de rescate, encabezados polo GES de Muros, afrontaron un complicado rescate es te luns no Monte Pindo. Catro sendeiristas, dúas mulleres e dous menores, foron localizados ao fío das doce de noite e tras tres horas de busca cando xa se atopaban presas polo pánico. Unha chamada ao 112 cando xa esmorecía a batería do teléfono móbil axudou a xeolocalizar a chamada e a conducir aos rescatadores cara as vítimas.

A primeira hora da tarde as catro persoas iniciaban unha ruta polo Monte Pindo dende O Fieiro. Facíano nun dia desapacible, con orballo e coa neboa empezando a facer acto de presenza. äs nove da noite deuse a voz de alarma cando estas catro persoas non regresaban aos seus vehículos. A esa hora a brétema xa rodeaba o Monte Pindo e a visibilidade era moi limitada. Nesa situación de nervios os camiñantes tomaron unha decisión que non recomendan os expertos: dividíronse por parellas, complicando inda máis a súa localización. Cando a batería do teléfono móbil dos sendeiristas xa se esgotaba, unha chamada dende o 112 axudou a precisar a súa posición, facilitando dar coa primeira parella. Coas indicacións que deron, os participantes na busca atoparon tamén aos outros desaparecidos. Estaban totalmente ateridos polo frío, cunha molladura considerable e presos dun ataque de pánico. Cunha visibillidade case nula a esas horas, de non producirse esa chamada de teléfono, o desenlace puido ter sido ben distinto.

Jesús López, policía local de Carnota e habitual participante nestes rescates dado o seu gran coñecemento do Monte Pindo, recorda o que sempre hai que levar cando se emprende unha actividade como a de subir ao Monte Pindo. "Hai que levar comida e bebida, roupa axeitada, calzado adecuado e un teléfono móbil ben cargado". Todo o que parece obvio pero que non sempre levan na mochila todos os que nos últimos tempos foron rescatados neste paraxe natural.