O Festival da Luz volve iluminar Boimorto durante este fin de semana

A Coruña

O director de Turismo de Galicia, Xosé Merelles, reivindicou o Festival da Luz, que se celebra desde hoxe e ata o domingo no municipio coruñés de Boimorto, como unha iniciativa musical que “contribúe a dinamizar turisticamente o rural galego” e como un evento con forte compoñente solidario, ao destinar fondos para apoiar a acción de diferentes ONG.

Merelles participou este xoves na presentación da nova edición do festival, impulsado pola cantante Luz Casal en 2012, que combina actuacións musicais de artistas consagrados e emerxentes.

Durante o acto, o director de Turismo destacou que a Xunta de Galicia apoia este evento dentro da súa estratexia para dinamizar o turismo no rural, que experimentou un crecemento do 6 % no número de viaxeiros durante o primeiro semestre deste ano.

Na presentación participaron tamén a propia Luz Casal, representantes doutras entidades colaboradoras e patrocinadoras, e a alcaldesa de Boimorto, María Jesús Novo.

Merelles subliñou que Galicia é un destino cun amplo abano de “propostas turísticas e alternativas para todo tipo de visitantes” e cualificou o Festival da Luz como un evento musical singular polo seu carácter solidario.

De feito, o festival leva recadado ao longo das súas 12 edicións máis dun millón de euros, que foron destinados a distintas asociacións que traballan en ámbitos como a loita contra o cancro, a sensibilización sobre o alzhéimer, os bancos de alimentos ou o apoio a persoas con enfermidades raras e as súas familias.

Nesta edición, o festival contará con catro escenarios e máis de vinte propostas de restauración e artesanía local, así como actividades para promover prácticas sostibles e unha ampla zona infantil.

Máis de 40 músicos e artistas participarán este ano, entre eles a propia Luz Casal (sábado 24), La Orquesta Mondragón, Mago de Oz, Derby Motoreta’s Burrito Kachimba, El Kanka, Ortiga, Satélite Salitre, Sara Socas, Familia Caamagno ou Fillas de Cassandra, entre outros.