O lume calcina un barco en Camariñas e un alpendre en Vimianzo

Costa da Morte

Noite moi complicada para os servizos contra incendios na Costa da Morte. Sobre as dúas da mañá un veciño daba a alerta de que un pesqueiro vasco atracado no porto de Camariñas estaba ardendo e que o lume xa chegara á ponte de mando, mesmo que se escoitaban explosións, na embarcación había bombonas de oxíxeno e butano.

Inmediatamente mobilizáronse medios de Salvamento Marítimo, Gardacostas, Garda Civil, Bombeiros e protección Civil. Os traballos prolongáronse ao longo de toda a noite, pouco antes das nove os bombeiros daban por controlado o lume. Afortunadamente non houbo que lamentar danos persoais e tampouco se veu afectado ningún outro barco. Mentres no lugar de Reparada en Vimianzo, o lume arrasou un alpendre de grandes dimensións próximo a unha vivenda. O lume afectou a seis remolques de rolos de palla calcinando completamente as instalacións afectadas.

Foi un particular o que alertou ao 112 Galicia pouco despois das doce e media. Dende o servizo de emerxencias, solicitouse a actuación dos Bombeiros de Cee e Santa Comba, do GES de Ponteceso, da Garda Civil e do Grupo de Voluntariado de Protección Civil de Vimianzo. Tamén se informou a Urxencias Sanitarias de Galicia-061 como medida preventiva. Os equipos de extinción traballaron cunha pa mecánica para retirar os rolos de herba e deixalos arder de forma controlada no exterior. Ao mesmo tempo, continúan refrixerando a zona para evitar que o lume se propagase a outras instalacións próximas onde tamén se almacenan rolos de herba seca. Os traballos continuaron ao longo da mañá.