Ana Pontón:"Pediremos unha comisión de investigación polo sobrecusto do Cunqueiro"

Vigo

Abrimos curso político no Hoy por Hoy Vigo coa líder do BNG, Ana Pontón. A portavoz nacional do BNG pasou polos estudos de Radio Vigo para falar da volta ao cole en educación, sanidade, infraestruturas e, como non, do curso político galego. A líder do BNG considerou como un dos grandes escándalos do verán o sobrecusto de máis de 450 millóns de euros na construción do Hospital Álvaro Cunqueiro. Pontón deixou claro que ese será un dos primeiros temas que levarán á primeira sesión no Parlamento, e xa avanzou que van rexistrar a petición dunha comisión de investigación polo tema do Cunqueiro.

Ana Pontón foi crítica co PP por dicir agora no Congreso, cando están na oposición, que a transferencia da AP-9 será un dos seus principais asuntos. Tamén criticou a postura do PSOE por non aproveitar a porta aberta que dá Bruxelas e manifestarse en contra do rescate da concesión. A líder da oposición recoñeceu que seguen os contactos co Goberno Central para que, canto antes, se actíven a suba das bonificacións ata o 70% para os usuarios da autoestrada galega. Un compromiso asinado no pacto de apoio ao Goberno actual de Pedro Sánchez que, dende Transportes, agarda poder activala nuns meses.

Pola súa banda, a líder nacionalista valorou moi positivamente que se estea traballando para que Galicia teña un sistema de cercanías e confía en que se avancen nos traballos para que se convirta en realidade, como se asinou, antes de que acabe esta lexislatura. Urxe á Xunta e Goberno Central a que sigan traballando e facendo os deberes para axilizar a conexión en alta velocidade Lisboa-Porto-Vigo. Á Xunta critícalle que faga “seguidismo” do que di Ayuso e que non se atrevan a defender con firmeza a prioridade da conexión entre Lisboa e Galicia como si defende Portugal.