Os premios Youtubeiras+ presentan unha nova edición coa incorporación das creadoras e creadores de TikTok
O prazo de inscrición xa está aberto e remata o venres 15 de novembro ás 23:59 horas
A Coruña
Os premios Youtubeiras reinventanse na edición de 2024 e cambian lixeiramente de nome para pasar a chamarse Youtubeiras+. Un pequeno cambio que, porén, engloba unha novidade importante: a incorporación das creadoras e creadores de contido en TikTok. Deste xeito, búscase achegar o proxecto ao público máis novo e potenciar a creación de contido en galego nas diferentes plataformas.
O prazo de inscrición xa está aberto e remata o venres 15 de novembro ás 23:59 horas.
Dentro da súa aposta pola evolución constante, este ano prodúcense algúns cambios na organización, mentres se manteñen os premios económicos de 7.500 euros a repartir entre as persoas gañadoras. No acto de presentación fixéronse públicos os nomes do xurado, formado pola xornalista Andrea Villa, o escritor Carlos Callón, o realizador audiovisual Iago Gordillo, Mónica Valencia, técnica de Normalización Lingüística, e Sara Varela, guionista.
