O dominio .gal celebra o seu 10º aniversario: unha década conectando a Galicia co mundo
Para coñecer mellor a súa historia e impacto, falamos con Darío Janeiro, director xeral de PuntoGal
Darío Janeiro, director de @punto_gal.
08:07
Compartir
El código iframe se ha copiado en el portapapeles
<iframe src="https://cadenaser.com/embed/audio/460/1729252404897/" width="100%" height="360" frameborder="0" allowfullscreen></iframe>
A Coruña
O dominio de Internet .gal acaba de cumprir dez anos, e esta celebración marca unha década de conexión directa entre Galicia, a súa cultura, lingua e identidade co ámbito global da rede. Desde a súa creación, o dominio foi moito máis que unha simple extensión web; converteuse nun símbolo da pertenza á comunidade galega, cunha forte implicación no mundo dixital e cultural.
Con motivo desta celebración, a Asociación PuntoGal, entidade xestora do dominio, está a organizar diferentes actividades que poñen de relevo o importante papel que xoga .gal para a nosa sociedade. Para coñecer mellor a súa historia e impacto, falamos con Darío Janeiro, director xeral de PuntoGal. en Hoy por Hoy en las Rías
Que é o dominio .gal?
"Pois .gal é unha entidade que xestiona un dominio de Internet, esas tres letras que aparecen ao final dunha dirección web, como .com ou .org", explica Darío Janeiro. "No caso de .gal, o que fai é identificarnos cun territorio, cunha lingua e cunha cultura: a galega".
Este dominio naceu coa finalidade de que as empresas, institucións e entidades galegas puidesen contar cun espazo propio na Internet, onde poder visibilizar e fortalecer a súa identidade galega.
O papel do galego no dominio .gal
Unha das preguntas que xorde con frecuencia é se é obrigatorio empregar o galego para rexistrar un dominio en .gal. Darío Janeiro aclara: "A lingua galega é necesaria para estar en .gal, ou, no caso de non poder usala, polo menos que as actividades sexan relacionadas co ámbito galego".
Este compromiso co idioma e a cultura fai do dominio .gal un reflexo auténtico do que representa Galicia no mundo dixital, proporcionando unha plataforma que promove o uso da nosa lingua e a identidade local en Internet.
A importancia de ter un dominio propio
Aínda que pareza algo simbólico, ter un dominio propio supón un gran avance para Galicia. "É unha oportunidade única que temos para manifestar a nosa identidade, a nosa lingua e cultura nun espazo tan vasto como é Internet", sinala Janeiro. A presenza dun dominio propio permite a Galicia ter un recoñecemento diferenciador no ciberespazo, algo que poucas comunidades ou rexións no mundo teñen.
Ademais, Janeiro destaca que "non só temos un dominio, senón que tamén participamos en foros internacionais nos que se decide o funcionamento da Internet, como os organizados pola ICANN (Internet Corporation for Assigned Names and Numbers). Alí, Galicia ten voz propia en cuestións clave como a ciberseguridade e a protección de datos".
Un dominio seguro e útil
Alén do seu valor simbólico e cultural, .gal destaca pola súa seguridade. "É un dominio controlado, cun menor número de rexistros que dominios máis grandes como .com, o que facilita a súa supervisión e a prevención de actividades maliciosas como o phishing", explica Janeiro. Esta vixilancia fai que o dominio .gal sexa un espazo seguro para as entidades galegas.
O impacto social de mercar un dominio .gal
Ao mercar un dominio .gal, os usuarios están contribuíndo a unha boa causa. A entidade PuntoGal non ten ánimo de lucro, o que significa que os ingresos xerados polos rexistros de dominios son reinvestidos en iniciativas culturais, tecnolóxicas e lingüísticas dentro de Galicia. "Deste xeito, cando mercas un dominio .gal, estás a apoiar proxectos que benefician á comunidade galega", comenta Janeiro.
Dez anos de loita e logros
O camiño ata a creación do dominio .gal non foi fácil. "Foi moi complicado conseguir que Galicia tivese o seu propio dominio. Foron moitos anos de traballo desinteresado por parte de moitas persoas, que se esforzaron para facer realidade este proxecto", lembra Janeiro. A obtención do dominio foi posible grazas ao apoio e colaboración de moitos galegos que creron na importancia de ter unha presenza propia en Internet.
O futuro de .gal
De cara ao futuro, PuntoGal planea seguir crecendo. "Cara finais de ano abriremos unha nova rolda de dominios, para que novas propostas poidan incorporarse ao ciberespazo galego", avanza Janeiro.
Logo de dez anos, o dominio .gal segue sendo unha peza fundamental na preservación e promoción da cultura e lingua galegas en Internet, demostrando que Galicia pode estar conectada ao mundo sen perder a súa esencia.
