Diego Giráldez "Gañar o Blanco Amor coas Obras Póstumas é dobremente emocionante"

Vigo

Convencido de que tanto a trama como as subtramas da súa nova novela "Obras Póstumas" lles van agradar ás lectoras e aos lectores, Diego Giráldez sabe que conta co apoio da crítica, e é que acaba de gañar o prestixioso premio Blanco Amor. "Gañar o Blanco Amor coas Obras Póstumas é dobremente emocionante", explica, porque "é unha novela que ten unha carga simbólica e emocional bastante poderosa". É froito de tres anos de traballo e leva o recoñecemento do xurado polo seu estilo "directo, rico e cargado de simbolismo" nunha obra na que aborda a historia dunha escritora que, ante o diagnóstico de demencia, reflexiona sobre a vida e sobre o seu traballo.

A prosa elaborada de Giráldez, engadiu o xurado, crea unha "atmosfera arrepiante" sobre o tempo e a memoria e mostra a "dura realidade" sobre o tratamento da enfermidade psiquiátrica do pasado "sen caer en estereotipos".

O galardón, organizado pola Fundación Eduardo Blanco-Amor coa colaboración da Deputación de Ourense, está dotado con 15.000 euros e unha peza artística do escultor Acisclo Manzano. Destacou sobre 49 orixinais.