Case un millón de euros para o mosteiro de Trandeiras

O pleno ordinario de Xinzo de Limia aprobou por unanimidade un convenio coa Confederación Hidrográfia Miño Sil para levar a cabo unha nova obra de conservación no Mosteiro de Trandeiras cun orzamento de 920.000 euros, dos cales o consistorio achegará o 15% e a CHMS o 85% restante. Este proxecto dá continuidade aos traballos realizados durante o verán, cando o Concello adquiriu a propiedade, de 15.000 m², onde se atopan as captacións de auga.

Outro dos temas abordados na sesión plenaria foi a aprobación por unanimidade dunha moción conxunta que insta á Xunta de Galicia a crear un Centro de Atención a Persoas con Discapacidade (CAPD) en Ourense, propoñendo que este sexa de xestión pública. Debateuse e aprobouse tamén a prórroga do contrato de servizos de Axuda a Domicilio, cos votos a favor de tódolos grupos.

No eido da mobilidade, aprobouse a proposta do grupo socialista para a creación dunha ordenanza municipal que regule os Vehículos de Mobilidade Persoal (VMP). O concelleiro de Mobilidade indicou que “estamos traballando na materia, máis esta normativa deberá adaptarse á nova Lei de Seguridade Vial, que se atopa aínda en tramitación a nivel estatal”.

Abordouse tamén a demolición da presa de Gudín, actualmente en execución, co derrube da mesma e a construción dunha balsa para a carga de auga en caso de incendios. O reaxuste económico aprobado busca minimizar a carga financeira inmediata para o Concello.