A Casa de Rosalía chega a Ribadavia cunha exposición ao aire libre
Percorre os seus 50 anos de historia
Inauguración da exposición de Rosalía de Castro nesta mañá de mércores.
Ribadavia.
Esta mañá inaugurouse en Ribadavia a mostra "Cincuenta anos da Casa de Rosalía. Exposición a Ceo Aberto", froito da colaboración da Deputación de Ourense. A exposición xa percorreu máis de vinte localidades galegas e tamén Braga (Portugal), pero Ribadavia será a primeira localidade da provincia de Ourense en recibila e onde a mostra estará ata finais de Semana Santa, na Praza Buxán.
O acto contou coa presenza do alcalde de Ribadavia, César Fernández; da concelleira de Cultura, Yolanda Gómez; a concelleira de Servizos, Mari Luz Expósito; a concelleira de Xuventude, Regina Bahamonde, e a concelleira do BNG, Maite Rodríguez. Ata Ribadavia tamén se desprazou o presidente da Fundación Rosalía de Castro, Anxo Angueira. A exposición percorre a historia da Casa-Museo de Rosalía desde a súa apertura en 1971 e reivindica o seu papel na memoria cultural galega.
A chegada da mostra reforza o vencello de Rosalía coa comarca do Ribeiro, onde recentemente se presentou o libro Persoeiros do Ribeiro na vida de Rosalía de Castro, de José Luís Chao Rey.
