Ana María del Carmen Blanco nomeada presidenta da Audiencia Provincial
Trátase da primeira muller neste cargo
Imaxe de arquivo da Audiencia provincial de Ourense.
Ourense.
O pleno do Consello Xeral do Poder Xudicial (CXPX) nomeou hoxe a Ana María del Carmen Blanco Arce presidenta da Audiencia Provincial de Ourense. A maxistrada é a primeira muller en presidir o alto órgano xudicial provincial, que supón, segundo Blanco, “un fito no camiño cara á igualdade na carreira xudicial”.
Tras a elección, manifestou o seu desexo de exercer o cargo con "rigorosidade, independencia e sentido institucional”, á vez que subliñou que a súa prioridade é “garantir unha Xustiza eficaz, moderna e accesible á cidadanía”.
Ademais, engadiu que, nestes intres, é de “vital importancia” reforzar, “con medios materiais e, sobre todo, persoais, os órganos xudiciais da provincia ante a inminente implementación da Lei Orgánica 1/25”.
Ingresou na carreira xudicial en 1987, sendo o seu primeiro destino o Xulgado de Primeira Instancia e Instrución do Carballiño. En 1989 exerceu como titular do Xulgado do Penal número 1 de Ourense e, desde 2004, exerce as súas funcións como maxistrada da Audiencia Provincial de Ourense. Na actualidade é a presidenta da sección segunda, penal, do alto órgano xudicial provincial.
