Rosa Rodríguez, Medalla Castelao 2025: “Só fun unha bandeirada da atención primaria”

A Coruña

Rosa Rodríguez, xa xubilada, viviu nas últimas semanas unha auténtica montaña rusa emocional. O recoñecemento dos seus compañeiros e pacientes na súa despedida do centro de saúde foi só o comezo dun mes cheo de homenaxes que culminou coa entrega da Medalla Castelao, un galardón que recibiu entre a emoción e a humildade: “Sigo sen sentirme merecente a título persoal, pero si como representante da atención primaria”.

A doutora lembra con especial emoción o 14 de maio, o día da súa despedida: “Foi un choque emocional tremendo. Aquel aplauso sincero dos meus pacientes foi o que puxo todo a rodar”.

A voz dunha xeración de profesionais

Durante a súa intervención institucional en San Domingos de Bonaval, Rosa Rodríguez non dubidou en poñer voz ás demandas históricas da atención primaria galega. “Temos dúas carencias fundamentais: falta de persoal e falta de tempo”, explicou. A doutora destacou tamén a importancia da continuidade asistencial: “Hai estudos que demostran que manter o mesmo médico durante 15 anos reduce a mortalidade un 25%”.

Criticou a excesiva burocracia, a sobrecarga asistencial e a falta de previsión no relevo xeracional. “Agora mesmo estamos xubilándonos moitos profesionais entre os 65 e os 70 anos, e o sistema non estaba preparado”, advertiu.

Unha vocación desde a infancia

Nacida en Sober e criada na Ribeira Sacra, Rosa soubo desde nena que quería ser médica. “Co catro anos, os Reis deixáronme un fonendo de xoguete, e xa non mirei para nada máis”, lembra. A súa traxectoria profesional levouna por Almería, Ponferrada e Carballiño ata establecerse na Coruña, cidade da que se declara “namorada”.

Formouse en medicina familiar e comunitaria no antigo Juan Canalejo, e traballou sempre na sanidade pública, entregada ao coidado dos seus pacientes. “Nunca máis volvín pensar en nada que non fose isto. Foi unha verdadeira paixón”.

Descubre la nueva app de Cadena SER Te ofrecemos una mejor experiencia de audio y video

Descargar

“A medalla é dos meus pacientes e do equipo de Durmideiras”

Rodríguez insistiu en que o galardón simboliza o labor colectivo: “É un recoñecemento para a atención primaria, para os sanitarios e non sanitarios, para todo o equipo de Durmideiras. Eu só fun a bandeirada”. Asegura que agora lle queda tempo para vivir esa segunda vocación que sempre a acompañou: o xornalismo.

Con humildade, orgullo e compromiso, Rosa Rodríguez representa a esencia da atención primaria: proximidade, entrega e humanidade. A Medalla Castelao 2025, en realidade, é un reflexo do que ela deu durante catro décadas de servizo.