O Hospital do Salnés é o primeiro comarcal de España en recibir unha acreditación de calidade no Servizo de Urxencias

Orgullo e satisfacción. Podemos empregar estas dúas palabras para definir o que senten os profesionais e tamén nós, os usuarios, do Servizo de Urxencias do Hospital Público do Salnés logo de ser recoñecido coa acreditación de calidade que outorga a Sociedade Española de Urxencias e Emerxencias (SEMES). O centro hospitalario vilagarcián convértese no primeiro centro comarcal de toda España que contará cunha distinción que recoñece o bo labor que desempeñan os seus profesionais de urxencias.

Entre os criterios que fixeron ao Hospital Público do Salnés merecedor desta credencial destacan os tempos de espera na atención das urxencias, a organización funcional do centro ou a formación coa que contan os máis de 100 profesionais que integran este servizo. O servizo de urxencias do Hospital do Salnés realizou en 2024 preto de 50.000 asistencias, cunha media de 135 cada día. O tempo medio de espera para a triaxe é de 8 minutos e de 33 minutos para a atencion posterior. Este Hospital Público ten unhas Urxencias que son unha das 20 unidades máis activas a nivel científico de todo o territorio nacional.

Neste acto estivo presente o conselleiro de Sanidade, Antonio Gómez Caamaño quen dixo “a Xunta aposta con firmeza pola especialización dos profesionais de Urxencias e temos reiteradas peticións realizadas polo Executivo galego ao Ministerio de Sanidade para que crease a especialidade de Medicina de Urxencias e Emerxencias. Agora precisamos que se materialice canto antes de forma seria e rigorosa en beneficio dos pacientes, dos profesionais e da organización sanitaria”.

Traslado da ambulancia medicalizada do 061 a Sanxenxo

Fóra do acto e a preguntas dos xornalistas, o conselleiro reiterou a idea da Fundación de Urxencias Médicas 061 de trasladar dende hoxe 1 de xullo a ambulancia medicalizada con base no Hospital do Salnés ó centro de saúde de Baltar (Sanxenxo). “A decisión corresponde a criterios exclusivamente técnicos aplicados a toda Galicia que garantan de xeito equitativa a cobertura de emerxencias e urxencias en toda a comunidade. Xa veremos nun futuro se entra nos plans do 061 a posibilidade de ter unha ambulancia medicalizada a maiores no verán na comarca do Salnés”, sinalou.

Pola súa banda o xerente da área sanitaria de Pontevedra – O Salnés, José Flores, manifestou que non se están deixando de atender urxencias vitais na comarca por estar ocupada a ambulancia medicalizada con outro traslado sanitario. “Sempre que falamos de que un recurso está ocupado por atender a outra persoa, pois, bendito sea. A ambulancia si que está no momento adecuado porque está con outro paciente crítico, da igual onde este a orixe, evidentemente temos unhas patoloxías que son tempo – dependentes e os profesionais saben o que facer cos transportes en ambulancias. Paréceme algo fóra de lugar que todos os anos teñamos que estar defendendo que cando a ambulancia medicalizada no Salnés está trasladando a un paciente crítico, primario ou secundario falle o sistema cando paralelamente se produce outra urxencia. Este é un servicio autonómico que non entende de “localismos” nin de decisións municipais”, argumentou o doutor Flores.

Preguntado tamén polos equipos médicos no PAC do centro de saúde de San Roque en Vilagarcía, o xerente José Flores, explicou que queda garantida a asistencia nestas instalacións con tres equipos médicos (tres médicos e tres enfermeiros) de luns a domingo pola tarde, e dous equipos médicos pola noite. Nas datas festivas coma a Festa da Auga este servizo reforzarase pola noite con un terceiro equipo.