As familias de Redondela xa poden recoller as axudas ao material escolar

O Concello de Redondela pon a disposición de máis de cen familias unha axuda de 70 euros para a compra de libros e material escolar. Esta iniciativa, dirixida a nenos e nenas de entre 3 e 5 anos matriculados en centros de Educación Infantil do municipio, supón un investimento total de máis de 7.000 euros por parte do goberno local.

As familias que cumpren os requisitos da convocatoria xa poden recoller o vale no Concello en horario de 9.00 a 11.00. Tamén é posible solicitar unha cita fóra deste horario chamando ao 986 400 300. Este vale de 70 euros pode ser trocado por material escolar e libros nas librarías locais que participan na iniciativa.

A alcaldesa, Digna Rivas, subliña que, aínda que non sexa unha competencia municipal, o Concello realiza este esforzo para "axudar ás familias que o precisan cos gastos de escolarización dos nenos e nenas".