O Concello de Mos inicia o proceso para rescindir o contrato do SAF

O Concello de Mos iniciou o expediente para a rescisión do contrato coa empresa que xestiona o SAF, tras detectar un elevado número de deficiencias e incumprimentos na prestación deste servizo esencial. A decisión, adoptada na Xunta de Goberno local, busca garantir un servizo de calidade para os veciños e veciñas do municipio.

A medida foi tomada despois de que a administración local constatase "múltiples incidencias" desde a adxudicación do contrato o pasado mes de abril, cun valor anual de 1.592.178 euros. Entre as carencias detectadas atópanse a excesiva rotación do persoal auxiliar, a demora en trámites e xestións, o incumprimento de horarios de atención e deficiencias na organización do servizo. Tamén se rexistraron erros de facturación e incumprimentos relacionados con recursos humanos e materiais.

Novo contrato con melloras

A alcaldesa de Mos, Nidia Arévalo, e a concelleira de Política Social, Sara Cebreiro, subliñaron que a principal prioridade é asegurar a continuidade da atención e o coidado das persoas usuarias, garantindo que o servizo se axuste ás súas necesidades e aos estándares de calidade que merece a cidadanía.

O Concello xa está a traballar na tramitación dun novo contrato que incorpore as melloras que a empresa actual non cumpriu. Entre estas melloras destacan a limitación da rotación de auxiliares, a zonificación do persoal, o acompañamento a citas médicas para usuarios sen rede familiar e a dotación completa de medios técnicos para o persoal.

A decisión de rescindir o contrato será elevada ao próximo Pleno para a súa ratificación, co obxectivo de pór en marcha canto antes un servizo máis eficiente e adaptado ás necesidades reais dos usuarios do Servizo de Axuda no Fogar.