Un emocionante Alalá de Muxía coral, ao solpor, para rematar a Romaría da Barca

Este pasado mes de Agosto Xabier Díaz daba un concerto en Muxía, durante o espectáculo citou aos presentes para “cantar ese alalá, un himno (do país) cantado da viva e emocionada voz, polas veciñas e veciños que tan marabillosa herdanza recibiron”.

Xabier cumpriu e acudiu á cita, os veciños de Muxía e de moitos outros puntos da Costa da Morte tamén, varios centos de persoas cantaron e viviron un momento tan fermoso e especial ao pé do santuario.

A iniciativa gustou tanto que xa se falou de repetilo tódolos anos para poñer o punto final da Romaría. Un acto sinxelo pero coa forza necesaria para converterse en tradición. Xabier Díaz anima a que o fagan, "eu tirei o guante para que o recolla a xente da vila, músicos, afeccionados, muxiáns en xeral se reúnan alí o último día da festa para cantar un himno tan bonito, esa é a miña idea, se Xabier pode estar, vai estar porque o disfrutéi moito".