Carballo espera 15 millóns de Euros de Fondos Europeos para continuar coa transformación urbanística

Radio Nordés emitiu hoxe o programa Vivindo a Costa da Morte en directo dende o Mercado Municipal de Carballo con motivo da Semana Europea de Mobilidade.

No transcurso do programa coñecemos as actividades previstas para os vindeiros días, con andainas, rutas en bici, exposicións e a celebración do día sen coches o vindeiro domingo. Juan Seoane, concelleiro de mobilidade, insistiu na responsabilidade individual para avanzar nunha mobilidade máis sostible e animou a utilizar menos o coche no día a día.

Pola súa banda, Xaime Díaz, autor do libro “Carballo, guía ilustrada de arquitectura” falou de arquitectura e historia adiantando algúns dos contidos da ruta prevista para esta tarde de xoves, facendo un repaso histórico dende a fundación do concello.

Como en outras ocasión a asociación Integro colabora co concello nesta conmemoración organizando unha xincana para demostrar a necesidade de ter rúas adaptadas e accesibles para as persoas con mobilidade reducida. Noelia barreira, directora de Integro, recordou a necesidade de que ademais dos concellos, as empresas deben mellorar a sensibilidade coas persoas con discapacidades adaptando as entradas e os interiores dos locais para facilitarlles o acceso.

Tamén pasou polos micrófonos de Radio Nordés Marcos Periscal, usuario habitual de bicicleta, que lle pediu ao goberno local máis zonas de aparcamento para bicis.

O programa pechouno o alcalde, Evencio Ferrero recordou que están pendentes dunha subvención europea, dos fondos EDIL (Estratexias de Desenvolvemento Integrado Local) para continuar coa transformación urbanística. Entre os proxectos que dependen desa axuda están o novo edificio para entidades sociais, o novo auditorio, a remodelación do entorno do edificio e a praza do concello ou a unión verde do IES Parga Pondal e o casco urbano.

Ferrero quixo tamén valorar a boa relación actual da administración local con Xunta e deputación, o que permite poñer en marcha moitos dos proxectos previstos polo goberno carballés.