Reclaman máis transporte público para o alumnado da educación non obligatoria da Costa da Morte
Óscar Insua acusa á Xunta de desatender as necesidades dos estudantes de bacharelato e ciclos formativos: “Son as familias quen teñen que buscar solucións, é unha vergoña”
Arriva
O deputado do BNG pola Costa da Morte, Óscar Insua, presentou no Parlamento galego varias iniciativas para que a Xunta cree novas liñas de transporte público que dean cobertura ao alumnado de ensinanzas non obrigatorias. O obxectivo é adaptar os horarios dos autobuses ás entradas e saídas dos institutos da comarca, unha demanda que, segundo o nacionalista, leva anos sen resposta.
Insua denuncia que, unha vez máis, o comezo do curso trouxo os mesmos problemas: estudantes de bacharelato e ciclos formativos seguen sen contar con servizos de transporte axeitados, sendo o autobús o único medio público dispoñible. A situación afecta a centros como o IES Terra de Soneira (Vimianzo), IES Maximino Romero de Lema (Baio), IES Agra de Raíces e IES Fernando Blanco (Cee).
O deputado sinala casos concretos como o do alumnado de Camariñas que acode a Vimianzo: o bus dispoñible sae ás 6:27 horas, moito antes do comezo das clases, e a volta pola tarde non se axusta ao horario lectivo. Tamén lembra que estudantes de Cee, Baio ou Ponteceso carece directamente de liñas regulares desde Camariñas, o que obriga ás familias a usar vehículos particulares.
Outros exemplos son os estudantes de Carnota, que non teñen parada diante do IES Fernando Blanco e deben camiñar ata o IES Agra de Raíces, ou os rapaces de Fisterra, que sofren falta de prazas nos autobuses. “Mesmo a inspectora de mobilidade puido comprobar como quedaban alumnos nas paradas porque non había sitio”, advertiu o BNG.
A formación lembra que os horarios de transporte tampouco coinciden cos das aulas —de mañá e de tarde, segundo se trate de bacharelato ou ciclos formativos—, o que tamén prexudica o alumnado de Muxía e Mazaricos.
“O único que piden os estudantes é ter un autobús que lles permita chegar en hora á clase e volver á casa cando acaben. Non parece unha demanda imposible de atender”, concluíu Insua, que reclama á Xunta un incremento urxente dos servizos na Costa da Morte.
