O Ourense pon punto e final ao soño da Copa para o Bergantiños
As Eiroas encheuse de afeccionados carballeses para arroupar ao seu equipo que loitou ante un rival de superior categoría
JORGE INSUA
O Bergantiños perdeu nas Eiroas por 0-2 ante o Ourense CF na tarde do mércores nun campo municipal ateigado de seareiros. Esta derrota trunca as opción do equipo vermello de disputar a Copa do Rei ante un 1ª división.
Os de Carballo afrontaron o encontro con ambición e mesmo foi mellor ca os visitantes no inicio de ambos tempos, mesmo tivo oportunidades de adiantarse no marcador.
Amin marcou os dous goles visitantes nos minutos 60 e 69, ambos tantos foron precedidos de erros propios na defensa local. Seguiu intentándoo o equipo dirixido por Simón Lamas, pero xa con menos xogo que gañas, o adestrador comentou ao final do encontro que o resultado non reflexa o sucedido no terreo de xogo e asegurou estar “contento do partido que fixeron os futbolistas”, engadiu que está satisfeito dado á situación á que chegaron ao encontro “con moitas baixas, cun plantel curto que fixo un esforzo brutal xogando cada tres ou catro días”.
O míster fixo especial fincapé en que o erro de Tass que propiciou o segundo gol ourensá, non lle afecte animicamente a “un xogador que está facendo un inicio de campaña espectacular e que é fundamental para nos”
Con esta derrota o equipo de Carballo centrase exclusivamente na liga de 2ªRFEF, este próximo domingo ás cinco da tarde reciben nas Eiroas ao Valladolid Promesas
