Camariñas activa a primeira fase do Museo dos Naufraxios coa apertura da Sala ‘Beti Donosti’
Solicitará á Deputación unha subvención de 330.000 euros para rehabilitar a Lonxa Vella e conservar un edificio de gran valor sentimental para o municipio
O Concello de Camariñas levará, este martes 7 de outubro, ao pleno extraordinario das 9 da mañá a aprobación do proxecto e a solicitude dunha nova subvención á Deputación da Coruña para executar a primeira fase do futuro Museo dos Naufraxios. Esta primeira actuación permitirá abrir ao público a Sala de Exposicións ‘Beti Donosti’, recuperando parte do histórico edificio da Lonxa Vella.
O investimento total ascende a 430.000 euros, dos cales 330.000 serán achegados pola Deputación —o 76,7% do orzamento— e o resto será asumido polo Concello. A axuda debe solicitarse de novo, tras a modificación do proxecto inicial aprobado en 2022, despois de que un informe recomendase o derrubamento do inmoble. O goberno local decidiu manter a aposta pola rehabilitación debido ao alto valor simbólico e patrimonial do edificio, demostrando que a súa estrutura permite a recuperación.
O proxecto prevé reparar e consolidar os elementos estruturais da Lonxa Vella, executar unha nova envolvente exterior e acondicionar a planta baixa para acoller a Sala ‘Beti Donosti’. Nela disporanse servizos e un espazo expositivo de uso público, comunicados a través dunha zona común con acceso desde o exterior.
Nesta primeira fase non se intervirá na planta alta, máis aló da demolición de escaleiras e tabiques interiores. A segunda fase centrará os traballos no acondicionamento interior e museográfico do Museo dos Naufraxios, completando a recuperación integral dun edificio que forma parte da identidade mariñeira de Camariñas.
