Localizan na Costa da Morte unha obra inédita de Urbano Lugrís
A Real Liga Naval Española presentará en Nadal “Arosa. Año Santo 1971”, unha obra da etapa final do pintor coruñés que une o mar e o Camiño de Santiago
A delegación da Real Liga Naval Española (RLNE) na Costa da Morte anunciou o achado dun cadro inédito de Urbano Lugrís, o pintor surrealista coruñés coñecido como o “pintor maior do mar de Galicia”. A obra apareceu nun domicilio particular da comarca, cuxo propietario prefire manter o anonimato.
A RLNE, que este ano celebra o seu 125 aniversario, ten previsto presentar a pintura durante as festas de Nadal nun espazo singular da zona.
Trátase dun óleo sobre táboa da etapa final de Lugrís, titulado “Arosa. Ano Santo 1971”, considerado a última obra coñecida do artista. O achado resulta especialmente significativo porque combina temática mariña e inspiración xacobea, dous dos elementos máis recorrentes na súa traxectoria.
Na composición represéntase un cuarto con xanela aberta ao mar, por onde navegan tres velas brancas. Sobre unha mesa de madeira aparecen unha caracola mariña, unha pipa de sepiolita e un farol de gas con forma de goleta dentro dunha botella. No cadro poden lerse as inscricións “Año Santo 1971” e “Arosa”, acompañadas do escudo de Vilagarcía de Arousa.
A obra estivo vinculada á familia San Claudio Santa Cruz e garda relación con outras pezas da súa colección, como Anticuario del puerto (1946), coa que comparte obxectos e composición.
