Xuízo para once acusados de tráfico de haxix e cocaína na Costa da Morte

A sección segunda da Audiencia Provincial da Coruña celebrará este mércores o xuízo contra once persoas acusadas de tráfico de drogas en varios concellos da Costa da Morte entre os anos 2007 e 2010. Para dez dos investigados, a Fiscalía solicita penas de 4 anos e 6 meses de cárcere. Para o outro acusado, que conta con antecedentes por feitos similares, amplía a petición ata os 10 anos e 6 meses de prisión por reincidencia.

Segundo o escrito fiscal, este último, en colaboración con outro dos acusados, mantivo entre 2007 e 2010 relacións comerciais cun terceiro implicado, que lle proporcionaba haxix e cocaína para a súa posterior distribución nas zonas de Cee e Corcubión, ademais doutros municipios da Costa da Morte. O primeiro deles encargaba unha segunda fase de distribución a outras persoas de confianza, entre as cales se atopan cinco dos procesados, como reflicten as escoitas policiais recollidas na causa.

Estas persoas, ao seu tempo, abastecían de estupefacientes a outros tres investigados. Os seguimentos realizados pola Policía puxeron de manifesto diferentes entregas, o que permitiu identificar aos once acusados chamados a xuízo. Por estes feitos, a Fiscalía reclama para todos eles multas equivalentes ao dobre do valor da droga incautada, que ascende a 210.553 euros.