Unanimidade no Parlamento para "axilizar todos os trámites necesarios" e poñer en marcha o servizo oncohematolóxico no Hospital de Cee en novembro

O deputado do BNG, Óscar Insua, levou ao Parlamento galego unha Proposición Non de Lei para reclamar a posta en funcionamento inmediata do servizo oncohematolóxico no Hospital Comarcal da Costa da Morte. A reclamación obtivo o apoio unánime da cámara.

A pesar de que as obras e o equipamento xa están rematados e o hospital conta con instalacións adaptadas, o servizo aínda non funciona completamente. Insua lamentou que os pacientes teñen que desprazarse á Coruña para recibir tratamentos oncolóxicos, situación que definiu como unha "falta de dignidade" para a comarca que paga os mesmos impostos que calquera outra zona urbanizada. O nacionalista presentou unha emenda para instar á Xunta a axilizar todos os trámites e pór en funcionamento o servizo neste mes de novembro, ademais de reclamar a implantación dalgunhas especialidades médicas como psiquiatría, neuroloxía, e urxencias 24 horas, para transformar o hospital nun centro de primeira categoría.

Pola súa banda, o Grupo Popular destacou que o Hospital de Día oncohematolóxico de Cee xa está operando parcialmente, con catro postos funcionais supervisados polo Servizo de Oncoloxía da Coruña. Segundo a portavoz popular de Sanidade, Encarna Amigo, este servizo vai lograr que o 60% dos pacientes oncolóxicos da Costa da Morte eviten desprazarse á Coruña para tratamentos e seguimentos. O PP resaltou o investimento de 88.500 euros en obras e equipamento e anunciou que nos orzamentos do próximo ano se reservan 326.000 euros para adquirir un novo mamógrafo, aumentando así a capacidade asistencial do hospital.

O BNG continúa denunciando atrasos e a falta de funcionamento pleno do servizo, e reivindica un compromiso real e efectivo para garantir unha atención sanitaria en igualdade para a veciñanza da Costa da Morte, achegando a especialización e os tratamentos necesarios sen depender dos desprazamentos a outros centros